السلام عليكم .
اليوم نزلت تدوينة و هذه الثانية . .
طبعًا أغلبيتنا ما زلنا طلاب ثانوية وما تحت أو جامعيين . .
دي الفترة القصيرة نحاول قد ما نقدر نجتهد فيه و نشد حيلنا
و الناس دي الفترة أنواع “
اللي مافيه يذاكر وساحب – في صوت جواته يقول له يلا ذاكر بس هو ساحب
مكسل بس يجتهد لو شوية – والفئة الأخيرة مجتهد
طبيعي كل شخص وطبيعته لكن في الأخير إنت لازم تجتهد حتى لو أقل شيء تقرأ و حتفهم الكتاب اللي بين يدينك
تعبك , ربنا ما راح يضيعه لك أبدًا و مهما كان ، صح كل حاجه مكتوبه وبأمر من ربنا لكن لازم إحنا نجتهد ونعمل الأسباب مو – تواكل – لاء !
لازم نتوكل على الله مافي حاجه تجي عالرايح و الجاي ببلاش .
ادعي ربك يوفقك و تنجح و انت اجتهد وذاكر .
| إرجع لربك و حسّن علاقتك معاه |
__ هو الوحيد اللي حيكون معاك في كل وقت حتى في الاختبار ، لا الغش ولا اللي حولك حتى المراقب ما حيكون معاك ولا بيساعدك __
- القاعدة الأولى ” إذا انت ما تذاكر من الأساس نصيحة – لا تحفظ – “
الحفظ ما يجيب نتيجة ، أعرف ناس تحفظ تحفظ وكل وقتها بالكتاب في النهاية ما تجيب الدرجة الكاملة !
- القاعدة الثانية ” إقرأ الدرس و أفهمه مزبوط “
لأن القراءة و الفهم يعززوا بعض بالتالي إنت حتثبت المعلومات بمخك بالتالي إنت تقريبًا حفظت الدرس بفهم .
يعني الحفظ ما يجي إلا بالفهم أولا بعدها حتثبت المعلومة بمخك بإذن الله .
- القاعدة الثالثة ” لا تحرم نفسك ولا أهلك “
دا الأسبوعين أكثر فترة تفوز بـ حاجة النفس للمفرحات و اللحظات اللطيفة .
لا تحرم نفسك من هواياتك من أوقات الفراغ من مساعدتك لأهلك من اهتمامك لذاتك .
ما عندك وقت ؟ طيب حاول ترتب جدولك اليومي . . لاء بلاش جدول يوم . . رتب الحاجات اللي تسويها في يومك .
- القاعدة الرابعة ” لا تخلي اليوم كله مذاكرة “
علشان نفسك ما تمل من المذاكرة الي تؤدي لعدم الرغبة في المذاكرة . .
أصحك تخلي يومك كله مذاكرة زي ما قلت رتب فروضك اليومية وخلي بينها أوقات راحة و ترفيه وطاعة الله و والدينك و اهتمام بنفسك كمان .
- القاعدة الخامسة ” هرم ماسلو أساسها ” الحاجه للغذاء “
نتذكر هرم ماسلو شوية
قاعدتها الأساسية هي حاجة الإنسان للأكل و الشرب و النوم . .
^ حاول في دي الأيام تغير نظام نومك ويكون ليلي و الصبح مع النهار كله نشاط .
بس لا تأكل أكثر مما هو مطلوب لأن البطنة تزيل الفطنة .
^ أكثر من شرب الماء لأن فوائدها لا تحصى ، غير إنها تعطي لجسمك حياة و صحة و مهمة جدا للدماغ والجسم بأكمله .
تقول لي من عشاق القهوة العربية السوداء التركية الشاي . . ؟
^حاول تقلص من كمية المنبهات و الغازيات ما حتنفعك أكثر من الماء .
الغازيات معروفة تجيب السمنة و السكر وغير اللي عندو قولون وحموضة وبلاوي زرقا
أحسن لك و لصحتك ولنفسك ” الماء “
حبذا لو عصير طبيعي كويس بس الأفضل الماء .
معادلة بسيطة [ مااء + 3 وجبات في اليوم + وجبات خفيفة بين الثلاث وجبات = نظام صحي ]
في ناس ما تقدر تخلص وجبتها الأساسية من الأساس فممكن تقسم وجبتك لوقت ثاني أو أحسن لك لا تغرف لك كثير ، غير إنه حيترمي وإهدار للنعمة الله لا يغضب علينا راح يكون ضغط عالبطن إذا أكلتها غصب وصار لمعدتك امتلاء شرير .
- أنبه إن الفواكه والسلطة تنأكل أولًا قبل الوجبة الأساسية علشان لا تتأخر في الهضم و تتأخر وما تعرف إش يصير بعدها
- الماء اشربها بعد الوجبة متأخرة شوية علشان لا تسبب لك امتلاء أو الشعور بالاستفراغ الله يكرمكم .
- إذا حاب تعرف إنت جيعان ولا ، اشرب كوب ماء و استنى كم دقيقة كذا إذا حاس إنك فعلا جوعان توكل على الله و إذا لاء فهذا إسمه جوع كاذب .
الله يوفقكم أجمعين ويكتب لكم الدرجات العليا في الدنيا والآخرة .
N E D 